இந்திய வேளாண் விஞ்ஞானி எம்.எஸ் சுவாமிநாதன் அவர்கள் மறைவு!!! முதல்வர் முக.ஸ்டாலின் அவர்கள் இரங்கல்!!!
இந்திய நாட்டின் வேளாண் விஞ்ஞானி மற்றும் பசுமைப் புரட்சியின் தந்தை என்று அழைக்கப்படும் எம்.எஸ் சுவாமிநாதன் அவர்கள் வயது மூப்பு காரணமாக இன்று(செப்டம்பர்28) காலமானார். இவரது மறைவு மிகுந்த வேதனை அளிக்கிறது என்று முதல்வர் முக.ஸ்டாலின் அவர்கள் இரங்கல் தெரிவித்து பதிவிட்டுள்ளார்.
இந்திய நாட்டின் வேளாண் விஞ்ஞானி மற்றும் பசுமை புரட்சியின் தந்தை என்று அழைக்கப்படும் எம்.எஸ் சுவாமிநாதன் அவர்கள் வேளாண்மை துறையில் பல மாற்றங்களையும் முன்னேற்றங்களையும் அபரிவிதமான வளர்ச்சியையும் கொண்டுவந்து உலகத்தின் மத்தியில் இந்தியாவை தலை நிமிரச் செய்தவர்.
1960 மற்றும் 1970களில் இந்தியா நாட்டில் நவீன விவசாய நுட்பங்களை எம்.எஸ் சுவாமிநாதன் அவர்கள் அறிமுகப்படுத்தினார். இந்தியாவில் உணவுப் பஞ்சம் ஏற்பட்ட காலகட்டத்தில் ஜப்பான் நாட்டில் கண்டுபிடிக்கப்பட்ட புதிய ரக கோதுமையை இந்தியாவிற்கு அறிமுகம் செய்து எம்.எஸ் சுவாமிநாதன் அவர்கள் இந்தியா மக்களின் பசியை போக்கினார். அப்போது பிரதமராக இருந்த இந்திரா காந்தி அவர்கள் இது கோதுமை புரட்சி என்று இவரை பாராட்டினார்.
எம்.எஸ் சுவாமிநாதன் அவர்கள் விவசாயம் மற்றும் உணவு பாதுகாப்பு ஆகியவற்றில் பெரும் பங்களிப்பு அளித்தார். இதற்காக இவருக்கு பத்மபூஷன், பத்மவிபூஷன் ஆகிய விருதுகள் வழங்கப்பட்டது. மேலும் பல விருதுகளை பெற்ற எம்.எஸ் சுவாமிநாதன் அவர்களுக்கு உலகம் முழுவதும் இருக்கும் 38 கல்லூரிகளில் இருந்து கௌரவ டாக்டர் பட்டம் கொடுக்கப்பட்டுள்ளது.
உணவு உற்பத்தியில் இந்தியாவை தன்னிறைவு பெற வைத்த விஞ்ஞானி எம்.எஸ் சுவாமிநாதன் அவர்கள் தனது 98வது வயதில் இன்று(செப்டம்பர்28) காலை 11.20 மணியளவில் காலமானார். இவரது மறைவிற்கு பிரதமர் நரேந்திர மோடி, முதல்வர் முக.ஸ்டாலின், ஆளுநர் ரவி ஆகியோர் இரங்கல் தெரிவித்துள்ளனர்.
எம்.எஸ் சுவாமிநாதன் அவர்கள் மறைவிற்கு இரங்கல் தெரிவித்து முதல்வர் முக.ஸ்டாலின் அவர்கள் வெளியிட்டுள்ள இரங்கல் பதிவில் “பசிப்பிணி ஒழிப்பு – உணவுப் பாதுகாப்பு என்ற இரு குறிக்கோள்களுக்காகக் கடந்த முக்கால் நூற்றாண்டு காலம் அரும்பணி ஆற்றி வந்த தலைசிறந்த வேளாண் அறிவியலாளர் திரு. எம்.எஸ் சுவாமிநாதன் அவர்கள் மறைந்தார் என்ற செய்தியறிந்து மிகவும் வருந்துகிறேன்.
நீடித்து நிலைத்த உணவுப் பாதுகாப்புக்காக ஆற்றிய பங்களிப்புகளுக்காக பசுமைப் புரட்சியின் தந்தை எனப் பரவலாகப் போற்றப்படும் திரு. சுவாமிநாதன் அவர்கள் உலக அரிசி ஆராய்ச்சி நிறுவனம் (IRRI), இந்திய வேளாண் ஆராய்ச்சி கவுன்சில் (ICAR) முதலிய பல்வேறு பன்னாட்டு மற்றும் அரசு ஆராய்ச்சி நிறுவனங்களின் உயர் பொறுப்புகளில் பணியாற்றிய சிறப்புக்குரியவர் ஆவார். ஒன்றிய வேளாண் அமைச்சகத்தின் முதன்மைச் செயலாளராக இருந்த அவர் பின்னர் மாநிலங்களவை உறுப்பினராகவும் பணியாற்றியுள்ளார்.
சமூகத் தலைமைக்கான ராமன் மகசேசே விருது, பத்ம ஸ்ரீ, பத்ம பூசன், பத்ம விபூசன் உள்ளிட்ட பல உயரிய விருதுகளை வென்ற திரு. சுவாமிநாதன் அவர்கள், இருபதாம் நூற்றாண்டில் மிகப் பெரும் தாக்கம் செலுத்திய ஆசிய ஆளுமைகள் என உலகப் புகழ் பெற்ற “டைம்” இதழ் வெளியிட்ட பட்டியலில் மகாத்மா காந்தி, இரவீந்திரநாத் தாகூர் ஆகியோருடன் இடம்பெற்ற இந்தியர் ஆவார்.
நாடு போற்றும் விஞ்ஞானியாக சுற்றுச்சூழல் வேளாண்மைத்துறையில் அளப்பரிய பங்காற்றிய திரு. சுவாமிநாதன் அவர்கள் 1989-91, 1996-2000 ஆகிய ஆண்டுகளில் முத்தமிழறிஞர் கலைஞர் அவர்கள் முதலமைச்சராக இருந்தபோது மாநிலத் திட்டக் குழுவிலும் இடம்பெற்று சீரிய ஆலோசனைகளை வழங்கியுள்ளார்.
தலைவர் கலைஞர் உடனும், என்னுடனும் எப்போதும் நல்ல நட்பைப் பேணி வந்தார். 1989-ஆம் ஆம் ஆண்டு முதலமைச்சராக இருந்த தலைவர் கலைஞர் அவர்களிடத்தில் திரு. சுவாமிநாதன் அவர்கள் கோரிக்கை வைத்ததும், தரமணியில் அவர் நிலம் வழங்கிய இடத்தில்தான் கடந்த முப்பதாண்டுகளுக்கும் மேலாக எம்.எஸ். சுவாமிநாதன் ஆராய்ச்சி நிறுவனம் செயல்பட்டு வருகிறது. கடந்த 2021-ஆம் ஆண்டு ஆகஸ்ட் மாதம் அந்நிறுவனத்தின் 32-ஆவது ஆண்டுவிழாவில் கலந்துகொண்டு உரையாற்றி, 96-ஆவது பிறந்தநாள் காணவிருக்கும் திரு. சுவாமிநாதன் அவர்கள் நூறாண்டு வாழ்க என வாழ்த்தியது தற்போது என் நெஞ்சில் நிழலாடுகிறது.
அவரது இழப்பு அறிவியல் துறைக்கும் தமிழ்நாட்டுக்கும் ஈடு செய்ய இயலாத பேரிழப்பாகும். மிகப்பெரும் ஆளுமையை இழந்து தவிக்கும் அறிவியல் உலகினருக்கும் அவரது குடும்பத்தார்க்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்” என்று முதல்வர் முக.ஸ்டாலின் அவர்கள் பதிவிட்டுள்ளார்.
